కరోనా వ్యాప్తి కారణంగా 2021 గణతంత్ర పరేడ్ వేడుకలు నిరాడంబరంగానే జరగనున్నాయి. కొత్త కరోనా వైరస్ ఆందోళన కలిగిస్తోన్న నేపథ్యంలో.. పరిమిత సంఖ్యలో సందర్శకులను అనుమతించనున్నారు. కొవిడ్ మార్గదర్శకాలను పాటిస్తూ.. కట్టుదిట్టమైన భద్రత నడుమ గణతంత్ర దినోత్సవానికి ఏర్పాట్లు చేస్తున్నారు అధికారులు. కొవిడ్-19 విజృంభణ నేపథ్యంలో.. ఎర్రకోటలో ఈ ఏడాది ఆగస్టు-15 వేడుకలు కూడా సాధారణంగానే జరిగాయి.
రిపబ్లిక్ డే(జనవరి-26)కు కొద్దిరోజులే మిగిలి ఉన్నందున.. ఢిల్లీ లో చల్లటి వాతావరణంలోనే కవాతు కోసం రిహార్సల్స్ చేస్తున్నారు సైనికులు.భారత 72వ గణతంత్ర వేడుకలకు బ్రిటన్ ప్రధాని బోరిస్ జాన్సన్ ముఖ్య అతిథిగా హాజరు కానున్నట్టు కేంద్ర విదేశాంగ మంత్రి ఎస్ జైశంకర్ పేర్కొన్నారు. ఫలితంగా భారత్-యూకే మధ్య ద్వైపాక్షిక సంబంధాలు మరింత బలోపేతమయ్యే అవకాశముందని ఆయన అభిప్రాయపడ్డారు.