హైదరాబాద్ నగరంలో నకిలీ అధికారుల ఆగడాలు రోజురోజుకూ పెరిగిపోతున్నాయి. తాజాగా గోషామహల్ పరిధిలో వీఐపీ స్టిక్కర్లతో హల్చల్ చేస్తూ, పోలీసులనే బెదిరించడానికి ప్రయత్నించిన ఓ నకిలీ అధికారి బాగోతాన్ని పోలీసులు రట్టు చేశారు.
గోషామహల్ ప్రాంతంలో పోలీసులు సాధారణ తనిఖీలు నిర్వహిస్తుండగా, ఒక ఫార్చ్యూనర్ వాహనం అనుమానాస్పదంగా కనిపించింది. ఆ కారుకు సైరన్ అమర్చి ఉండటంతో పాటు, విండోపై వీఐపీ స్టిక్కర్లు అంటించి ఉన్నాయి. పోలీసులు ఆ వాహనాన్ని అడ్డుకోగా, అందులో ఉన్న వ్యక్తి విధుల్లో ఉన్న సిబ్బందిపై దురుసుగా ప్రవర్తించాడు.
కారులో ఉన్న వ్యక్తి తనను తాను అధికారినని చెప్పుకుంటూ హ్యూమన్ రైట్స్ కమిషన్ (Human Rights Commission) కు సంబంధించిన గుర్తింపు కార్డును చూపించాడు. ఆ ఐడీ కార్డును క్షుణ్ణంగా పరిశీలించిన పోలీసులు, అది నకిలీదని గుర్తించారు. సదరు వ్యక్తి పోలీసులను తప్పుదోవ పట్టించేందుకు నకిలీ పత్రాలను సృష్టించినట్లు తేలింది.
ఈ ఘటనకు సంబంధించి ప్రధాన నిందితుడు గిరీష్ కుమార్ అగర్వాల్ మరియు అతని సహచరులపై పోలీసులు కేసు నమోదు చేశారు.నిందితులపై కొత్త చట్టం BNS (భారతీయ న్యాయ సంహిత) మరియు మోటార్ వెహికల్ చట్టం కింద ఎఫ్ఐఆర్ (FIR) నమోదు చేశారు.నిందితుడు వాడుతున్న ఖరీదైన ఫార్చ్యూనర్ వాహనాన్ని పోలీసులు స్వాధీనం చేసుకున్నారు.
ఈ కేసులో గిరీష్ కుమార్ అగర్వాల్తో పాటు ఉన్న మరికొందరు నిందితులు ప్రస్తుతం పరారీలో ఉన్నట్లు తెలుస్తోంది. వారి కోసం పోలీసులు గాలింపు చర్యలు చేపట్టారు.నకిలీ స్టిక్కర్లు, సైరన్లు వాడుతూ సామాన్యులను లేదా అధికారులను భయపెట్టాలని చూస్తే కఠిన చర్యలు తప్పవని పోలీసులు హెచ్చరిస్తున్నారు. కేవలం హోదా ఉన్న అధికారులు మాత్రమే ప్రభుత్వం కేటాయించిన స్టిక్కర్లు వాడాలని, నిబంధనలు అతిక్రమిస్తే వాహనాలను సీజ్ చేయడంతో పాటు జైలు శిక్ష కూడా పడవచ్చని స్పష్టం చేశారు.
ప్రస్తుతం ఈ ఘటన హైదరాబాద్లోని అధికార వర్గాల్లో చర్చనీయాంశంగా మారింది. నకిలీ ఐడీ కార్డుల ముఠా వెనుక ఉన్న సూత్రధారులను పట్టుకునేందుకు గోషామహల్ పోలీసులు దర్యాప్తును ముమ్మరం చేశారు.
