తెలుగులో టాప్ యాంకర్ ఎవరంటే ఠక్కున గుర్తొచ్చే ఆన్సర్ సుమ కనకాల. ఎక్కడో కేరళలో జన్మించిన సుమ.. తెలుగు నేర్చుకొని ఇక్కడ స్టార్ యాంకర్గా పేరు సంపాదించుకున్నది. ఇండస్ట్రీకి వచ్చిన తొలినాళ్లలో టీవీలో సీరియల్స్లో చిన్న చిన్న పాత్రలు చేసేది. ఆ తర్వాత యాంకరింగ్లో అడుగుపెట్టాక.. ఇక తిరుగులేని క్రేజ్ సంపాందించింది. కేవలం ఆమె కోసమే టీవీ షోలు చూసేవాళ్లు ఉన్నారంటే అతిశయోక్తి కాదేమో. ఈటీవీలో వచ్చిన స్టార్మహిళ షోను చాలా ఏళ్లపాటు సుమ ఒంటిచేత్తో నడిపించింది. ఇక చాలా కాలం పాటు ఎక్కడ ఏ సినిమా ఫంక్షన్ జరిగినా సుమే కనిపించేది. ఇక ఆమె భర్త రాజీవ్ కనకాల కూడా మంచి నటుడే. రాజీవ్ తండ్రి దేవదాస్ కనకాల గొప్ప నటుడు, శిక్షకుడు కూడా.
ఇదిలా ఉంటే సుమ.. రాజీవ్ కనకాల విడిపోయారంటూ చాలా రోజులుగా వార్తలు వస్తున్నాయి. ఈ విషయంపై వీళ్లిద్దరూ క్లారిటీ ఇచ్చినప్పటికీ పుకార్లు ఆగలేదు. తాజాగా ఈ విషయంపై రాజీవ్ కనకాల స్పందించారు. ‘ సుమ ఇవాళ ఈ స్థాయిలో ఉందంటే కారణం ఆమె ప్రతిభ. నేను ప్రత్యేకంగా చేసింది ఏమీ లేదు. ఇక నేను సుమ విడిపోయామంటూ చాలా కాలంగా వార్తలు వస్తున్నాయి. అందులో ఏ మాత్రం నిజం లేదు. అయితే మేము కొంతకాలం విడిగా ఉన్నాం. దీంతో చాలా మంది మేము విడిపోయామని భావించారు.
మా నాన్న దేవదాస్ కనకాల మణికొండలో ఉండేవారు. మేము ఎల్అండ్టీ అపార్ట్స్మెంట్లో ఉండేవాళ్లం. అయితే అమ్మ చనిపోయాక.. నాన్నను మా దగ్గరకు తీసుకుపోవాలని ట్రై చేశాం. కానీ ఆయన లైబ్రరీ చాలా పెద్దగా ఉంది. ఆయనతో పాటు ఆ లైబ్రరీ మొత్తం మా అపార్ట్మెంట్కు తీసుకురావడం కుదరలేదు. లైబ్రరీ లేకుండా తాను రాలేనని నాన్న చెప్పారు. దీంతో నేను కొంతకాలం పాటు మా నాన్న దగ్గర ఉన్నాను. సుమ పిల్లలు అపార్ట్మెంట్ లో ఉండేవాళ్లు. దీంతో మా మీద పుకార్లు వచ్చాయి’ అంటూ వివరణ ఇచ్చాడు రాజీవ్ కనకాల.