సోనూసూద్ చేస్తున్న సేవలు చూసి ఆశ్చరపోవడం మినహా ఏమీ చేయలేం. కేవలం సాయం చేసేందుకు పుట్టాడేమో అన్నట్టుగా ఆయన సేవలు విస్తరిస్తున్నాయి. ఇప్పటికే కరోనా ఫస్ట్వేవ్లో తన వంతు సాయం చేసి.. దేశవ్యాప్తంగా ఎంతో మంచిపేరు తెచ్చుకున్నాడు సోనూ. ఇక సెకండ్వేవ్లోనూ ఎంతో మందికి ఊపిరి అందించాడు సోనూసూద్. ఇప్పటికే కొన్ని రాష్ట్రాల్లో ఆక్సిజన్ ప్లాంట్లు ఏర్పాటు చేసి.. కోవిడ్ బాధితులకు ఆక్సిజన్ అందిస్తున్నాడు. ఏపీలోని కర్నూలు, నెల్లూరు జిల్లాల్లో ఆక్సిజన్ ప్లాంట్లు ఏర్పాటు చేశాడు.
ఇక కొన్ని రాష్ట్రాల్లో ఫోన్ చేసిన వెంటనే ఆక్సిజన్ కాన్సన్ట్రేటర్లు పంపిస్తున్నాడు. అయితే తాజాగా సోనూసూద్ మరో సంచలన నిర్ణయం తీసుకున్నాడు. దేశవ్యాప్తంగా మొత్తం 16 నుంచి 18 రాష్ట్రాల్లో ఆక్సిజన్ పాంట్లు ఏర్పాటు చేసి.. 1500 నుంచి 2000 బెడ్లు ఉన్న ప్రతి ఆస్పత్రికి ఆక్సిజన్ ప్లాంట్ల ద్వారా ఆక్సిజన్ కొరత లేకుండా చేయాలని నిర్ణయం తీసుకున్నాడు. ప్రభుత్వాలు చేయాల్సిన పనిని కూడా చేస్తున్నాడు సోనూసూద్.
Also Read: కళ్లను మాయ చేసే వీడియో.. ఆకు సీతాకొక చిలుకై ఎగిరిపోయింది..!
‘మూడోవేవ్, నాలుగో వేవ్ వచ్చే వరకు మనం ఎందుకు ఎదురుచూడాలి. ముందే ఏర్పాట్లు చేస్తే బాగుంటుంది కదా అందుకే నేను ఈ నిర్ణయం తీసుకున్నాను. ఈ దేశంలో ఇంకా సాయం కోసం ఎదురుచూసే పేద ప్రజలు చాలా మంది ఉన్నారు. వారికి సేవ చేసేందుకు కొందరు ముందుకు వస్తే బాగుంటుంది. ఇది సేవ కాదు. కేవలం నా బాధ్యతగా భావిస్తున్నాను’ అంటూ సోనూసూద్ పేర్కొన్నాడు. ఆయన సేవా కార్యక్రమాలు చూసి ప్రజలు ఫిదా అయిపోతున్నారు. ప్రభుత్వాలు కూడా సోనూసూద్ లా ముందుచూపుతో ఆలోచిస్తే ఎవరికీ ఏ కష్టాలు ఉండవని అంటున్నారు.